Laburpena

Artikulu honek, Bizkaiko testuinguruan, seme-alabak kargura dituzten familiek epe luzeko langabeziari nola aurre egiten dieten ezagutaraztea du helburu. Horretarako, ikerketa kualitatibo bat burutu da 23 pertsona langabeturi egindako sakoneko elkarrizketen bitartez. Ikerketak erakusten du ‘baliabide ekonomikoetara sarrera’ eta ‘babes sozialaren eskuragarritasuna’ kategoriek, familiek beraien egoeraz egiten duten balorazioan, etorkizunaren inguruan egiten dituzten aurreikuspenetan eta nahietan zuzenean eragiten dutela eta, hortaz, beraien egoera sozioekonomikoa mantentzeko ala hobetzeko erabiltzen dituzten estrategietan ere eragiten dutela. Bi kategoria hauek ardatz egituratzaile bezala erabiliz, kalteberatasun egoeran dauden familiek langabeziaren eraginari nola aurre egiten dioten azaltzen duen eredu esplikatibo baten eraikitzea aurkezten da.